مشکل ہے پتہ چلنا قصوں سے محبت کا

مشکل ہے پتہ چلنا قصوں سے محبت کا

اندازہ مصیبت میں ہوتا ہے مصیبت کا

ہے نزع کے عالم میں بیمار محبت کا

مشکل ہے سنبھلنا اب بگڑی ہوئی حالت کا

افسوس کہ ہم سو کر جاگے بھی تو کب جاگے

مرنے پہ کھلا عقدہ جینے کی حقیقت کا

وہ آئے ہیں خود اپنے دیوانے کو سمجھانے

اے جذبۂ دل دیکھا اقبال محبت کا

اے چشم حقیقت بیں دل کی ہے بساط اتنی

اک چھوٹا سا ٹکڑا ہے آئینۂ حسرت کا

کیوں عشق کے جھگڑے کو لے جاتا ہے عقبیٰ میں

کر خاتمہ دنیا میں دنیا کی مصیبت کا

اے قدرؔ حسینوں کو میں دل سے نہ کیوں چاہوں

جب حسن پرستی بھی اک ذوق ہے فطرت کا

mushkil hai pata chalna qisson se mohabbat ka

andaza musibat mein hota hai musibat ka

hai nazaa ke alam mein bimar-e-mohabbat ka

mushkil hai sambhalna ab bigri hui halat ka

afsos ke ham so kar jage bhi to kab jage

marne pe khula uqda jine ki haqiqat ka

wo ae hain khud apne diwane ko samjhane

ai jazba-e-dil dekha iqbal mohabbat ka

ai chashm-e-haqiqat bin dil ki hai bisat itni

ik chhota sa tukra hai aina-e-hasrat ka

kyun ishq ke jhagre ko le jata hai uqba mein

kar khatima duniya mein duniya ki musibat ka

ai qadr hasinon ko main dil se na kyun chahun

jab husn parasti bhi ik zauq hai fitrat ka