Arooz is now on the App Store, for iPhone and iPad. Download →

All poetry

غم جب ان کا دیا ہوا غم ہے

Raees Niyazi (1920–1994)

غم جب ان کا دیا ہوا غم ہے

حیف اس آنکھ پر جو پر نم ہے

دل کی آواز لاکھ مدھم ہے

دل کی آواز میں بڑا دم ہے

زندگی میں سکون کے طالب

زندگی خود ہی مستقل غم ہے

ان کے جاتے ہی یہ ہوا محسوس

جیسے تاروں میں روشنی کم ہے

چین ہے ترک آرزو کے بعد

آرزوؤں کا نام ہی غم ہے

ہر نفس مخزن الم ہے رئیسؔ

شکر ہے عمر آدمی کم ہے