Arooz is now on the App Store, for iPhone and iPad. Download →

All poetry

منزل یار بے نشاں بھی نہیں

Raees Niyazi (1920–1994)

منزل یار بے نشاں بھی نہیں

دل ہو غافل تو رازداں بھی نہیں

برق کیوں بے قرار ہے اتنا

اب تو گلشن میں آشیاں بھی نہیں

ہو نظر میں اگر حقیقت حسن

زندگی سادہ داستاں بھی نہیں

وہ جفاؤں پہ شرمسار نہ ہوں

اب یہ منزل مجھے گراں بھی نہیں

یار کی جستجو کو کیا کہئے

رائیگاں بھی ہے رائیگاں بھی نہیں

دل تک آئے تو وجہ تسکیں ہو

وہ نظر اتنی مہرباں بھی نہیں

اللہ اللہ سرور یاد حبیب

اب مجھے ہجر کا گماں بھی نہیں

لب تک آ جائے تو قیامت ہے

عاشقی کار بے فغاں بھی نہیں

عظمت حسن عشق سے ہے رئیسؔ

سر نہیں ہے تو آستاں بھی نہیں