تمہاری بزم میں مجھ تک بھی جام آیا تو

تمہاری بزم میں مجھ تک بھی جام آیا تو

وفور شوق نے کوئی مقام پایا تو

قدم قدم پہ ہماری ہی آزمائش ہے

اگر تمہیں کسی منزل پہ آزمایا تو

ہم اپنی تاب نظر سے بہت پشیماں ہیں

پھر اب کی بار ہمیں کچھ نظر نہ آیا تو

دل تباہ سے شاید کوئی کرن پھوٹی

حریم شوق کا ہر گوشہ جگمگایا تو

تمہارے غم کو متاع حیات سمجھا ہوں

بہ اتفاق یہ غم بھی نہ راس آیا تو

مجھے ستاؤ بڑے شوق سے ستاؤ تم

مجھے ستا کے بھی تم نے نہ چین پایا تو

tumhari bazm mein mujh tak bhi jam aya to

wafur-e-shauq ne koi maqam paya to

qadam qadam pe hamari hi azmaish hai

agar tumhen kisi manzil pe azmaya to

ham apni tab-e-nazar se bahut pasheman hain

phir ab ki bar hamen kuchh nazar na aya to

dil-e-tabah se shayad koi kiran phuti

harim-e-shauq ka har gosha jagmagaya to

tumhare gham ko mata-e-hayat samjha hun

ba ittifaq ye gham bhi na ras aya to

mujhe satao bare shauq se satao tum

mujhe sata ke bhi tum ne na chain paya to