ویسے تو کم ہی میاں اہل جنوں روتے ہیں

ویسے تو کم ہی میاں اہل جنوں روتے ہیں

دیکھنے والے سمجھتے ہیں کہ خوں روتے ہیں

پوچھنے والے بضد ہیں کہ بتایا جائے

رونے والوں کو نہیں یاد کہ کیوں روتے ہیں

مجھ سے مت پوچھ کہ تفریق نہیں کر سکتا

میں تو ہنستے ہوئے لوگوں کو کہوں روتے ہیں

وہ بہت خوش ہے نیا گھر ہے نیا شہر مگر

گاؤں میں اس کی حویلی کے ستوں روتے ہیں

تم کو ہم جیسے مگر خوش ہی نظر آئیں گے

یہ جو ہم جیسے ہیں آنکھوں کے دروں روتے ہیں

اس کی آنکھوں کو کہاں آتا تھا رونا ساحرؔ

میں نے پھر رو کے دکھایا تھا کہ یوں روتے ہیں

waise to kam hi miyan ahl-e-junun rote hain

dekhne wale samajhte hain ke khun rote hain

puchhne wale bazid hain ke bataya jae

rone walon ko nahin yad ke kyun rote hain

mujh se mat puchh ke tafriq nahin kar sakta

main to hanste hue logon ko kahun rote hain

wo bahut khush hai naya ghar hai naya shahr magar

gaon mein us ki haweli ke sutun rote hain

tum ko ham jaise magar khush hi nazar aenge

ye jo ham jaise hain ankhon ke darun rote hain

us ki ankhon ko kahan ata tha rona sahir

main ne phir ro ke dikhaya tha ke yun rote hain