میں تہی دست محبت میں بھلا کیا دیتا

میں تہی دست محبت میں بھلا کیا دیتا

تیرے حصے سے مگر تجھ کو زیادہ دیتا

زندگی تو نے بڑی دیر لگا دی ورنہ

میں تجھے ملتا ترے گال پہ بوسہ دیتا

بعض اوقات اگر شعر نہ ہوتا مجھ سے

اس کی آنکھوں کا اشارہ مجھے مصرعہ دیتا

میں زمانے کو بناتا تو زمانے بھر کو

تیری آنکھیں ترا چہرہ ترا لہجہ دیتا

تو ٹھہرتا تو کوئی حل بھی نکل سکتا تھا

ساتھ چلتا نہ ترے مشورہ اچھا دیتا

تم کو لالچ تھی خزانے کی سو ناکام ہوئے

مجھ سے کہتے تو میں اس غار کا نقشہ دیتا

اتنا خوش تھا وہ بچھڑتے ہوئے مجھ سے ورنہ

پاؤں پڑتا میں اسے روکتا سمجھا دیتا

پیٹھ پیچھے سے اگر وار نہ کرتا ساحرؔ

اپنے دشمن کے جنازے کو میں کندھا دیتا

main tahi dast-e-mohabbat mein bhala kya deta

tere hisse se magar tujh ko ziyada deta

zindagi tu ne bari der laga di warna

main tujhe milta tire gal pe bosa deta

baaz auqat agar sher na hota mujh se

us ki ankhon ka ishara mujhe misra deta

main zamane ko banata to zamane bhar ko

teri ankhen tira chehra tira lahja deta

tu thaharta to koi hal bhi nikal sakta tha

sath chalta na tire mashwara achchha deta

tum ko lalach thi khazane ki so nakam hue

mujh se kahte to main is ghar ka naqsha deta

itna khush tha wo bichharte hue mujh se warna

paon parta main use rokta samjha deta

pith pichhe se agar war na karta sahir

apne dushman ke janaze ko main kandha deta