ہوا میں تیر رہے ہیں سحاب مٹی کے

ہوا میں تیر رہے ہیں سحاب مٹی کے

زمیں پہ آئیں گے اک دن عذاب مٹی کے

مجھے تو اس سے کئی آدمی بنانے تھے

پرند بھی نہ بنے دستیاب مٹی کے

فلک سے نور کی صورت سوال اترے تھے

دیے زمین نے لیکن جواب مٹی کے

یہ کس جہان میں مجھ کو گمان لے آیا

ابھر رہے ہیں یہاں آفتاب مٹی کے

پھر ایک روز اسے چاک پر اتارا گیا

پھر اس کے بعد ہوئے دن خراب مٹی کے

کیے گئے تھے ہزاروں ہی تجربات مگر

بدن رہے ہیں فقط کامیاب مٹی کے

یہ اس کے نقش کف پا ہیں اور لگتے ہیں

زمیں پہ جیسے کھلے ہوں گلاب مٹی کے

کسی کے واسطے ساحر چراغ تھے لیکن

ہوا کے ہاتھ پہ رکھے تھے خواب مٹی کے

hawa mein tir rahe hain sahab mitti ke

zamin pe aenge ik din azab mitti ke

mujhe to us se kai admi banane the

parind bhi na bane dastyab mitti ke

falak se nur ki surat sawal utre the

diye zamin ne lekin jawab mitti ke

ye kis jahan mein mujh ko guman le aya

ubhar rahe hain yahan aftab mitti ke

phir ek roz use chak par utara gaya

phir is ke baad hue din kharab mitti ke

kiye gae the hazaron hi tajribat magar

badan rahe hain faqat kamyab mitti ke

ye us ke naqsh-e-kaf pa hain aur lagte hain

zamin pe jaise khule hun gulab mitti ke

kisi ke waste sahir charagh the lekin

hawa ke hath pe rakhe the khwab mitti ke