نیند سے مجھ کو جگاتا ہے چلا جاتا ہے

نیند سے مجھ کو جگاتا ہے چلا جاتا ہے

وہ مرے خواب میں آتا ہے چلا جاتا ہے

اور میں ٹیک ہٹاتا نہیں دروازے سے

عشق آواز لگاتا ہے چلا جاتا ہے

چھیڑ وہ راگ لہو آنکھ سے نکلے دل کا

تو بھی کیا گیت سناتا ہے چلا جاتا ہے

میرا کردار کہانی میں فقط اتنا ہے

کوئی روتا ہوا آتا ہے چلا جاتا ہے

روز اول کا تھکا ہارا مسافر اک دن

بوجھ کاندھوں سے گراتا ہے چلا جاتا ہے

ایک طبقہ تو کئی نسل سے اس دنیا سے

خواب آنکھوں میں سجاتا ہے چلا جاتا ہے

تجھ کو معلوم نہیں تیری طلب کا لمحہ

کتنی صدیوں کو مٹاتا ہے چلا جاتا ہے

جس طرح سے یہ زمیں گھوم رہی ہے ساحر

بات ایسے وہ گھماتا ہے چلا جاتا ہے

nind se mujh ko jagata hai chala jata hai

wo mire khwab mein ata hai chala jata hai

aur main tek hatata nahin darwaze se

ishq awaz lagata hai chala jata hai

chher wo rag lahu ankh se nikle dil ka

tu bhi kya git sunata hai chala jata hai

mera kirdar kahani mein faqat itna hai

koi rota hua ata hai chala jata hai

roz-e-awwal ka thaka hara musafir ik din

bojh kandhon se girata hai chala jata hai

ek tabqa to kai nasl se is duniya se

khwab ankhon mein sajata hai chala jata hai

tujh ko maalum nahin teri talab ka lamha

kitni sadiyon ko mitata hai chala jata hai

jis tarah se ye zamin ghum rahi hai sahir

bat aise wo ghumata hai chala jata hai