پہاڑوں سے راہ سفر پر اکیلے — Madhu Madhuman

Arooz is now on the App Store, for iPhone and iPad. Download →

پہاڑوں سے راہ سفر پر اکیلے

نکلتے ہیں دریا سراسر اکیلے

گزرتی ہے کیا کیا اذیت کسی پر

کوئی چل کے دیکھے گھڑی بھر اکیلے

ہو کتنا بھی مشکل سفر پر یہ دریا

تو چلتا ہی رہتا ہے ہنس کر اکیلے

ملے ان سے آکر نہ دریا اگر تو

بھریں گے کبھی کیا سمندر اکیلے

جو کرتے ہیں چنتا سبھی کی خوشی کی

وہ رہتے ہیں دنیا میں اکثر اکیلے

یہ دنیا بھلا راس آئی کب ان کو

صدا سے رہے ہیں پیمبر اکیلے

سکھاتا ہے سورج یہ ہم کو کہ کیسے

کرے کوئی جگ کو منور اکیلے

نہ سنگی نہ ساتھی نہ روپیہ نہ پیسہ

گیا اس جہاں سے سکندر اکیلے

انہیں یاد رکھتی ہے دنیا یہ مدھومنؔ

جو لیتے ہیں دنیا سے ٹکر اکیلے