کچھ اس قدر طویل تھا وہ دور انتظار کا

کچھ اس قدر طویل تھا وہ دور انتظار کا

کہ رفتہ رفتہ بجھ گیا چراغ دل میں پیار کا

چمن میں مستقل رہا خزاں کا دور یوں کہ پھر

یہ دل ہی منتظر نہیں رہا کسی بہار کا

نہ اب وہ رہ گزر رہی نہ وہ سفر نہ ہم سفر

مگر ہے دل پہ آج بھی اثر اسی خمار کا

یقین کر لیا تھا میں نے اس پہ آنکھ موند کر

بس اک یہی تو تھا قصور مجھ گناہ گار کا

نہ خوشبوئیں گلوں کی اب نہ سائبان کا پتہ

نہ جانے کب تلک چلے سفر یہ ریگزار کا

تھی زندگی چڑھاؤ پر تو مختصر لگا سفر

مگر لگا طویل خوب راستہ اتار کا

نہ دے سکے گا کچھ تمہیں سوائے درد دل کے یہ

تو کیوں اٹھا کے چل رہے ہو بوجھ یہ غبار کا

kuchh is qadar tawil tha wo dur intizar ka

ke rafta rafta bujh gaya charagh-e-dil mein pyar ka

chaman mein mustaqil raha khizan ka daur yun ke phir

ye dil hi muntazir nahin raha kisi bahar ka

na ab wo rah guzar rahi na wo safar na ham safar

magar hai dil pe aj bhi asar isi khumar ka

yaqin kar liya tha main ne us pe ankh mund kar

bas ik yahi to tha qusur mujh gunah gar ka

na khushbuen gulon ki ab na saiban ka pata

na jane kab talak chale safar ye regzar ka

thi zindagi charhao par to mukhtasar laga safar

magar laga tawil khub rasta utar ka

na de sakega kuchh tumhen siwae dard-e-dil ke ye

to kyun utha ke chal rahe ho bojh ye ghubar ka