ہر آدمی کہاں اوج کمال تک پہنچا

ہر آدمی کہاں اوج کمال تک پہنچا

عروج حد سے بڑھا تو زوال تک پہنچا

خود اپنے آپ میں جھنجھلا کے رہ گیا آخر

مرا جواب جب اس کے سوال تک پہنچا

غبار کذب سے دھندلا رہا ہمیشہ جو

وہ آئنہ مرے کب خد و خال تک پہنچا

چلو نہ سر کو اٹھا کر غرور سے اپنا

گرا ہے جو بھی بلندی سے ڈھال تک پہنچا

جسے بھروسا نہیں تھا اڑان پر اپنی

وہی پرندہ شکاری کے جال تک پہنچا

طواف کرتے رہے سب ہی راستے میں مگر

ہر ایک شخص ہی گرد ملال تک پہنچا

مری نجات کا ہوگا ظفرؔ وسیلہ وہی

جو لفظ نعت کا میرے خیال تک پہنچا

har admi kahan auj-e-kamal tak pahuncha

uruj had se barha to zawal tak pahuncha

khud apne ap mein jhanjhla ke rah gaya akhir

mira jawab jab us ke sawal tak pahuncha

ghubar kizb se dhundla raha hamesha jo

wo aina mire kab khad-o-khal tak pahuncha

chalo na sar ko utha kar ghurur se apna

gira hai jo bhi bulandi se dhal tak pahuncha

jise bharosa nahin tha uran par apni

wahi parinda shikari ke jal tak pahuncha

tawaf karte rahe sab hi raste mein magar

har ek shakhs hi gard-e-malal tak pahuncha

miri najat ka hoga zafar wasila wahi

jo lafz naat ka mere khayal tak pahuncha