اے موسم جنوں یہ عجب طرز قتل ہے

اے موسم جنوں یہ عجب طرز قتل ہے

انسانیت کے کھیتوں میں لاشوں کی فصل ہے

اپنے لہو کا رنگ بھی پہچانتی نہیں

انسان کے نصیب میں اندھوں کی نسل ہے

منصف تو فیصلوں کی تجارت میں لگ گئے

اب جانے کس سے ہم کو تقاضائے عدل ہے

دشمن کا حوصلہ کبھی اتنا قوی نہ تھا

میرے تباہ ہونے میں تیرا بھی دخل ہے

لڑتے بھی ہیں تو پیار سے منہ موڑتے نہیں

ہم سے کہیں زیادہ تو بچوں میں عقل ہے

تاریخ کہہ رہی ہے کہ چہرہ بدل گیا

انسان ہے مصر کہ وہی اپنی شکل ہے

دعویٔ خوں بہا نہ تظلم نہ احتجاج

کس بے نوائے وقت کا عبرتؔ یہ قتل ہے

ai mausam-e-junun ye ajab tarz-e-qatl hai

insaniyat ke kheton mein lashon ki fasl hai

apne lahu ka rang bhi pahchanti nahin

insan ke nasib mein andhon ki nasl hai

munsif to faislon ki tijarat mein lag gae

ab jane kis se ham ko taqaza-e-adl hai

dushman ka hausla kabhi itna qawi na tha

mere tabah hone mein tera bhi dakhl hai

larte bhi hain to pyar se munh morte nahin

ham se kahin ziyada to bachchon mein aql hai

tarikh kah rahi hai ke chehra badal gaya

insan hai musir ke wahi apni shakl hai

daawa-e-khun baha na tazallum na ehtijaj

kis be nawa-e-waqt ka ibrat ye qatl hai