اپنے احسانوں کا نیلا سائباں رہنے دیا

اپنے احسانوں کا نیلا سائباں رہنے دیا

چھین لی چھت اور سر پر آسماں رہنے دیا

آج اس کی بے زبانی نے مجھے سمجھا دیا

کس لئے فطرت نے گل کو بے زباں رہنے دیا

زندگی تو کیا اثاثہ تک نہیں باقی بچا

قاتلوں نے اب کے بس خالی مکاں رہنے دیا

خوف رسوائی سے میں نے خط جلا ڈالا مگر

جانے کیوں اس چاند سے لب کا نشاں رہنے دیا

دوستی کو اپنی مجبوری نہیں سمجھا کبھی

فاصلہ میں نے برابر درمیاں رہنے دیا

بے گناہی کی صفائی دے بھی سکتا تھا مگر

کچھ سمجھ کر میں نے اس کو بد گماں رہنے دیا

آگ کے بازی گروں نے اب کے کھیل ایسا کھیلا

شہر کی تقدیر میں خالی دھواں رہنے دیا

کیا سیاسی چال ہے یہ ظالمان وقت کی

لے لیا سب کچھ مگر اک خوف جاں رہنے دیا

چونک چونک اٹھتا ہوں میں راتوں کو عبرتؔ خوف سے

خواب اس نے میری آنکھوں میں کہاں رہنے دیا

apne ehsanon ka nila saiban rahne diya

chhin li chhat aur sar par asman rahne diya

aj us ki be zabani ne mujhe samjha diya

kis liye fitrat ne gul ko be zaban rahne diya

zindagi to kya asasa tak nahin baqi bacha

qatilon ne ab ke bas khali makan rahne diya

khauf-e-ruswai se main ne khat jala dala magar

jane kyun is chand se lab ka nishan rahne diya

dosti ko apni majburi nahin samjha kabhi

fasla main ne barabar darmiyan rahne diya

be gunahi ki safai de bhi sakta tha magar

kuchh samajh kar main ne us ko bad guman rahne diya

ag ke bazi garon ne ab ke khel aisa khela

shahr ki taqdir mein khali dhuan rahne diya

kya siyasi chal hai ye zaliman-e-waqt ki

le liya sab kuchh magar ik khauf-e-jan rahne diya

chaunk chaunk uthta hun main raton ko ibrat khauf se

khwab us ne meri ankhon mein kahan rahne diya