کب ہوس کاروں نے دنیا کے دہانے دیکھے

کب ہوس کاروں نے دنیا کے دہانے دیکھے

ڈوبنے کے جو تھے دنیا میں ٹھکانے دیکھے

اپنے خلوت‌ کدۂ غم میں رہے اہل حجاب

بے حجابی نے تو محشر کے زمانے دیکھے

سرخیاں جن کی ہیں مرکوز نگاہ عالم

تم نے وہ قصے پڑھے ہیں جو فسانے دیکھے

ایک ہلکا سا بھی پرتو نظر آیا نہ ترا

یوں تو ہم نے بھی کئی آئنہ خانے دیکھے

دور جب حق و صداقت سے ہوئے اہل خرد

ہر نفس اپنی تباہی کے ٹھکانے دیکھے

آج تک ان کی حقیقت نہ کھلی ہم پہ نشاطؔ

خواب ہی رہ گئے جو خواب سہانے دیکھے

kab hawas karon ne duniya ke dahane dekhe

dubne ke jo the duniya mein thikane dekhe

apne khalwat kada-e-gham mein rahe ahl-e-hijab

be hijabi ne to mahshar ke zamane dekhe

surkhiyan jin ki hain markuz nigah-e-alam

tum ne wo qisse parhe hain jo fasane dekhe

ek halka sa bhi partau nazar aya na tira

yun to ham ne bhi kai aina khane dekhe

dur jab haq-o-sadaqat se hue ahl-e-khirad

har nafas apni tabahi ke thikane dekhe

aj tak un ki haqiqat na khuli ham pe nishat

khwab hi rah gae jo khwab suhane dekhe