لغزش سے رہنماؤں کی جب ہم سنبھل گئے

لغزش سے رہنماؤں کی جب ہم سنبھل گئے

منزل قریب آئی تو رستے بدل گئے

ہر راہ رو سے تیرا پتہ پوچھتے ہوئے

ہم راہ دیر و کعبہ سے آگے نکل گئے

پھوٹی ہے جب بھی تیرے تبسم کی اک کرن

گھبرا کے خود بخود ہی اندھیرے پگھل گئے

رندان‌ تشنہ کام کو اب مے سے کیا غرض

ساقی کی چشم مست سے جب دور چل گئے

اب بھی جبین زیست پہ فاقوں کی ہے شکن

مانا کہ زندگی کے تقاضے بدل گئے

ان کے نقوش پا کا یہ اعجاز دیکھیے

ذرے مہہ‌ و نجوم کے سانچے میں ڈھل گئے

جب بھی نکھر گیا مرے شعروں کا بانکپن

اے دوست فکر و فن کے کئی دیپ جل گئے

ایسی چلیں ہوائیں حوادث کی اے نشاطؔ

افسانۂ حیات کے عنواں بدل گئے

laghzish se rahnumaon ki jab ham sambhal gae

manzil qarib ai to raste badal gae

har rah ro se tera pata puchhte hue

ham rah dair-o-kaaba se age nikal gae

phuti hai jab bhi tere tabassum ki ik kiran

ghabra ke khud bakhud hi andhere pighal gae

rindan-e-tishna kam ko ab mai se kya gharaz

saqi ki chashm-e-mast se jab dur chal gae

ab bhi jabin-e-zist pe faqon ki hai shikan

mana ke zindagi ke taqaze badal gae

un ke nuqush-e-pa ka ye ejaz dekhiye

zarre maha-o-nujum ke sanche mein dhal gae

jab bhi nikhar gaya mire sheron ka bankpan

ai dost fikr-o-fan ke kai dip jal gae

aisi chalen hawaen hawadis ki ai nishat

afsana-e-hayat ke unwan badal gae