وہ مرا کثرت انوار سے حیراں ہونا

وہ مرا کثرت انوار سے حیراں ہونا

ہر طرف طور بکف ان کا نمایاں ہونا

کس قدر ہے تری رحمت پہ بھروسا یا رب

مجھ کو آیا نہ گناہوں پہ پشیماں ہونا

اہل دل چل تو دئے ہیں در جاناں کی طرف

کس کی قسمت میں ہے خاک در جاناں ہونا

ان کے وعدے کی خوشی کا یہ مکمل ہے ثبوت

شام سے پہلے مرے گھر میں چراغاں ہونا

آدمی چاہے تو کوشش سے فرشتہ بن جائے

سخت دشوار ہے اس کا مگر انساں ہونا

فیض یہ میرے جنوں کا ہے چمن میں جاری

غنچوں نے سیکھ لیا چاک گریباں ہونا

جس میں افسردہ ہوں غنچے بھی بہاریں بھی نشاطؔ

قابل فخر کہاں اس کا گلستاں ہونا

wo mira kasrat-e-anwar se hairan hona

har taraf tur bakaf un ka numayan hona

kis qadar hai tiri rahmat pe bharosa ya rab

mujh ko aya na gunahon pe pasheman hona

ahl-e-dil chal to diye hain dar janan ki taraf

kis ki qismat mein hai khak-e-dar janan hona

un ke waade ki khushi ka ye mukammal hai subut

sham se pahle mire ghar mein charaghan hona

admi chahe to koshish se farishta ban jae

sakht dushwar hai us ka magar insan hona

faiz ye mere junun ka hai chaman mein jari

ghunchon ne sikh liya chak-e-gareban hona

jis mein afsurda hun ghunche bhi baharen bhi nishat

qabil-e-fakhr kahan us ka gulistan hona