نفس سے جو لڑا نہیں کرتے

نفس سے جو لڑا نہیں کرتے

روح پر وہ جلا نہیں کرتے

کیوں نہ ہو پھر فساد دنیا میں

لوگ خوف خدا نہیں کرتے

اہل دل اہل ظرف اہل نظر

بات دل کی کہا نہیں کرتے

ان کا جینا عبث ہے دنیا میں

جو کسی کا بھلا نہیں کرتے

بزم عشرت میں عاشقان طرب

نالۂ دل سنا نہیں کرتے

دوستی کیا کروں میں پھولوں سے

یہ ہمیشہ کھلا نہیں کرتے

درس لو ٹوٹتے حبابوں سے

سر اٹھا کر چلا نہیں کرتے

اے جلیؔ دہر کے ستائے ہوئے

زندگی کی دعا نہیں کرتے

nafas se jo lara nahin karte

ruh par wo jala nahin karte

kyun na ho phir fasad duniya mein

log khauf-e-khuda nahin karte

ahl-e-dil ahl-e-zarf-e-ahl-e-nazar

bat dil ki kaha nahin karte

un ka jina abas hai duniya mein

jo kisi ka bhala nahin karte

bazm-e-ishrat mein ashiqan-e-tarab

nala-e-dil suna nahin karte

dosti kya karun main phulon se

ye hamesha khula nahin karte

dars lo tutte hababon se

sar utha kar chala nahin karte

ai jali dahr ke satae hue

zindagi ki dua nahin karte