بستی بستی کوچہ کوچہ شہر کو لالہ فام کیا

بستی بستی کوچہ کوچہ شہر کو لالہ فام کیا

دیکھو تو ان اہل ہوس نے کیسا قتل عام کیا

ہم تو جہاں کے سلطانوں سے بہتر اس کو جانے ہیں

جس نے روکھی سوکھی کھا کر گدڑی میں آرام کیا

حرص و ہوا کے اس جنگل میں صرف وہی ہے مرد جری

نفس کا طائر جس انساں نے زیست میں زیر دام کیا

قریہ قریہ خاک اڑا کر شام و سحر درویشوں نے

کیسے کیسے سنگ دلوں کو حسن عمل سے رام کیا

ظلم کی کالک خون سے دھو کر حق کی خاطر ولیوں نے

لوگ ہمیشہ یاد رکھیں گے ایسا اونچا کام کیا

دیکھ کے نیرنگیٔ گلشن ٹھنڈے دل سے سوچو تو

کس نے فروغ ظلمت دے کر نور سحر کو شام کیا

جب بھی رویا صدق دل سے رب کی حب میں زار و زار

اشک جلیؔ نے میرے حق میں رحمت بن کر کام کیا

basti basti kucha kucha shahr ko lala fam kiya

dekho to un ahl-e-hawas ne kaisa qatl-e-am kya

ham to jahan ke sultanon se behtar us ko jane hain

jis ne rukhi sukhi kha kar gadri mein aram kya

hirs-o-hawa ke is jangal mein sirf wahi hai mard-e-jari

nafas ka tair jis insan ne zist mein zer-e-dam kya

qarya qarya khak ura kar sham-o-sahar darweshon ne

kaise kaise sang dilon ko husn-e-amal se ram kiya

zulm ki kalak khun se dho kar haq ki khatir waliyon ne

log hamesha yad rakhenge aisa uncha kam kiya

dekh ke nairangi-e-gulshan thande dil se socho to

kis ne farogh-e-zulmat de kar nur-e-sahar ko sham kya

jab bhi roya sidq-e-dil se rab ki hub mein zar-o-zar

ashk jali ne mere haq mein rahmat ban kar kam kiya