ہم کہ چہرے پہ نہ لائے کبھی ویرانی کو

ہم کہ چہرے پہ نہ لائے کبھی ویرانی کو

کیا یہ کافی نہیں ظالم تری حیرانی کو

کار فرہاد سے یہ کم تو نہیں جو ہم نے

آنکھ سے دل کی طرف موڑ دیا پانی کو

شیشۂ شوق پہ تو سنگ ملامت نہ گرا

عکس گل رنگ ہی کافی ہے گراں بانی کو

دامن چشم میں تارا ہے نہ جگنو کوئی

دیکھ اے دوست مری بے سر و سامانی کو

تو رکے یا نہ رکے فیصلہ تجھ پر چھوڑا

دل نے در کھول دیے ہیں تری آسانی کو

ہاں مجھے ضبط ہے سودا ہے جنوں ہے شاید

دے لو جو نام بھی چاہو مری نادانی کو

جس میں مفہوم ہو کوئی نہ کوئی رنگ غزل

سعدؔ جی آگ لگے ایسی زباں دانی کو

ham ke chehre pe na lae kabhi wirani ko

kya ye kafi nahin zalim tiri hairani ko

kar-e-farhad se ye kam to nahin jo ham ne

ankh se dil ki taraf mor diya pani ko

shisha-e-shauq pe to sang-e-malamat na gira

aks-e-gul rang hi kafi hai giran bani ko

daman-e-chashm mein tara hai na jugnu koi

dekh ai dost miri be sar-o-samani ko

tu ruke ya na ruke faisla tujh par chhora

dil ne dar khol diye hain tiri asani ko

han mujhe zabt hai sauda hai junun hai shayad

de lo jo nam bhi chaho miri nadani ko

jis mein mafhum ho koi na koi rang-e-ghazal

saad ji ag lage aisi zaban dani ko