تم نے کیسا یہ رابطہ رکھا

تم نے کیسا یہ رابطہ رکھا

نہ ملے ہو نہ فاصلہ رکھا

نہیں چاہا کسی کو تیرے سوا

تو نے ہم کو بھی پارسا رکھا

پھول کھلتے ہی کھل گئیں آنکھیں

کس نے خوشبو میں سانحہ رکھا

تو نہ رسوا ہو اس لیے ہم نے

اپنی چاہت پہ دائرہ رکھا

جھوٹ بولا تو عمر بھر بولا

تم نے اس میں بھی ضابطہ رکھا

کوئی دیکھے یہ سادگی اپنی

پھول یادوں کا اک سجا رکھا

سعدؔ الجھا رہا مگر اس نے

تجھ سے ملنے کا راستہ رکھا

tum ne kaisa ye rabta rakha

na mile ho na fasla rakha

nahin chaha kisi ko tere siwa

tu ne ham ko bhi parsa rakha

phul khulte hi khul gain ankhen

kis ne khushbu mein saneha rakha

tu na ruswa ho is liye ham ne

apni chahat pe daira rakha

jhut bola to umr bhar bola

tum ne is mein bhi zabta rakha

koi dekhe ye sadgi apni

phul yadon ka ik saja rakha

saad uljha raha magar us ne

tujh se milne ka rasta rakha