عجب تلاش مسلسل کا اختتام ہوا

عجب تلاش مسلسل کا اختتام ہوا

حصول رزق ہوا بھی تو زیر دام ہوا

تھا انتظار منائیں گے مل کے دیوالی

نہ تم ہی لوٹ کے آئے نہ وقت شام ہوا

ہر ایک شہر کا معیار مختلف دیکھا

کہیں پہ سر کہیں پگڑی کا احترام ہوا

ذرا سی عمر عداوت کی لمبی فہرستیں

عجیب قرض وراثت میں میرے نام ہوا

نہ تھی زمین میں وسعت مری نظر جیسی

بدن تھکا بھی نہیں اور سفر تمام ہوا

ہم اپنے ساتھ لئے پھر رہے ہیں پچھتاوا

خیال لوٹ کے جانے کا گام گام ہوا

ajab talash musalsal ka ikhtitam hua

husul-e-rizq hua bhi to zer-e-dam hua

tha intizar manaenge mil ke diwali

na tum hi laut ke ae na waqt-e-sham hua

har ek shahr ka meyar mukhtalif dekha

kahin pe sar kahin pagri ka ehtiram hua

zara si umr adawat ki lambi fehristen

ajib qarz wirasat mein mere nam hua

na thi zamin mein wusat miri nazar jaisi

badan thaka bhi nahin aur safar tamam hua

ham apne sath liye phir rahe hain pachhtawa

khayal laut ke jane ka gam gam hua