Arooz is now on the App Store, for iPhone and iPad. Download →

All poetry

باہر بھی اب اندر جیسا سناٹا ہے

Aanis Moin (1960–1986)

باہر بھی اب اندر جیسا سناٹا ہے

دریا کے اس پار بھی گہرا سناٹا ہے

شور تھمے تو شاید صدیاں بیت چکی ہیں

اب تک لیکن سہما سہما سناٹا ہے

کس سے بولوں یہ تو اک صحرا ہے جہاں پر

میں ہوں یا پھر گونگا بہرا سناٹا ہے

جیسے اک طوفان سے پہلے کی خاموشی

آج مری بستی میں ایسا سناٹا ہے

نئی سحر کی چاپ نہ جانے کب ابھرے گی

چاروں جانب رات کا گہرا سناٹا ہے

سوچ رہے ہو سوچو لیکن بول نہ پڑنا

دیکھ رہے ہو شہر میں کتنا سناٹا ہے

محو خواب ہیں ساری دیکھنے والی آنکھیں

جاگنے والا بس اک اندھا سناٹا ہے

ڈرنا ہے تو انجانی آواز سے ڈرنا

یہ تو آنسؔ دیکھا بھالا سناٹا ہے