جیون کو دکھ دکھ کو آگ اور آگ کو پانی کہتے

جیون کو دکھ دکھ کو آگ اور آگ کو پانی کہتے

بچے لیکن سوئے ہوئے تھے کس سے کہانی کہتے

سچ کہنے کا حوصلہ تم نے چھین لیا ہے ورنہ

شہر میں پھیلی ویرانی کو سب ویرانی کہتے

وقت گزرتا جاتا اور یہ زخم ہرے رہتے تو

بڑی حفاظت سے رکھی ہے تیری نشانی کہتے

وہ تو شاید دونوں کا دکھ اک جیسا تھا ورنہ

ہم بھی پتھر مارتے تجھ کو اور دیوانی کہتے

تبدیلی سچائی ہے اس کو مانتے لیکن کیسے

آئینے کو دیکھ کے اک تصویر پرانی کہتے

تیرا لہجہ اپنایا اب دل میں حسرت سی ہے

اپنی کوئی بات کبھی تو اپنی زبانی کہتے

چپ رہ کر اظہار کیا ہے کہہ سکتے تو آنسؔ

ایک علاحدہ طرز سخن کا تجھ کو بانی کہتے

jiwan ko dukh dukh ko ag aur ag ko pani kahte

bachche lekin soe hue the kis se kahani kahte

sach kahne ka hausla tum ne chhin liya hai warna

shahr mein phaili wirani ko sab wirani kahte

waqt guzarta jata aur ye zakhm hare rahte to

bari hifazat se rakhi hai teri nishani kahte

wo to shayad donon ka dukh ik jaisa tha warna

ham bhi patthar marte tujh ko aur diwani kahte

tabdili sachchai hai us ko mante lekin kaise

aine ko dekh ke ik taswir purani kahte

tera lahja apnaya ab dil mein hasrat si hai

apni koi bat kabhi to apni zabani kahte

chup rah kar izhar kya hai kah sakte to anas

ek alahida tarz-e-sukhan ka tujh ko bani kahte