زخم میرے دل پہ اک ایسا لگا

زخم میرے دل پہ اک ایسا لگا

اپنی جاں کا روح کو دھڑکا لگا

اس کا چہرہ بھی جو اوروں سا لگا

آسماں پہ چاند مٹی کا لگا

دیکھتا کیا کیا کنار آب جو

خود میں اپنے آپ کو الٹا لگا

خود نمائی کے بھرے اک شہر میں

اپنے قد سے ہر کوئی اونچا لگا

روشنی دل کی اچانک گل ہوئی

خود کو تھوڑی دیر میں اندھا لگا

سائے میں اس کے طلب کی دھوپ تھی

دھوپ میں وہ نیم کا سایا لگا

زندگی سے ہاتھ ہم نے دھو لیے

وقت اک بہتا ہوا دریا لگا

zakhm mere dil pe ik aisa laga

apni jan ka ruh ko dharka laga

us ka chehra bhi jo auron sa laga

asman pe chand mitti ka laga

dekhta kya kya kanar-e-ab ju

khud main apne ap ko ulta laga

khud numai ke bhare ik shahr mein

apne qad se har koi uncha laga

raushni dil ki achanak gul hui

khud ko thori der mein andha laga

sae mein us ke talab ki dhup thi

dhup mein wo nim ka saya laga

zindagi se hath ham ne dho liye

waqt ik bahta hua dariya laga