پلکوں پہ رکا قطرۂ‌ مضطر کی طرح ہوں

پلکوں پہ رکا قطرۂ‌ مضطر کی طرح ہوں

باہر سے بھی بے چین میں اندر کی طرح ہوں

باہر سے مرے جسم کی دیوار کھڑی ہے

اندر سے میں اک ٹوٹے ہوئے گھر کی طرح ہوں

نظروں سے گرا دو کہ مجھے دیوتا مانو

پتھر کے تراشے ہوئے پیکر کی طرح ہوں

چھائی ہیں مرے سر پہ سیہ پوش گھٹائیں

میں صبح میں بھی شام کے منظر کی طرح ہوں

اندر کی چٹانوں سے نہ ٹکرا کے بکھر جاؤں

میں بپھرا ہوا خود پہ سمندر کی طرح ہوں

تم جلوہ نما ہو تو کھلی ہیں مری آنکھیں

آ لپٹو بدن سے تو میں چادر کی طرح ہوں

رہتا ہے کہیں جسم بھٹکتی ہے کہیں روح

گھر میں ہوں مگر آج میں بے گھر کی طرح ہوں

اقدار کی اٹھتی ہوئی دیوار میں چن لو

رستے میں پڑا میں کسی پتھر کی طرح ہوں

palkon pe ruka qatra-e-muztar ki tarah hun

bahar se bhi be chain mein andar ki tarah hun

bahar se mire jism ki diwar khari hai

andar se main ik tute hue ghar ki tarah hun

nazron se gira do ke mujhe dewta mano

patthar ke tarashe hue paikar ki tarah hun

chhai hain mire sar pe siyah posh ghataen

main subh mein bhi sham ke manzar ki tarah hun

andar ki chatanon se na takra ke bikhar jaun

main biphra hua khud pe samundar ki tarah hun

tum jalwa numa ho to khuli hain miri ankhen

a lipto badan se to main chadar ki tarah hun

rahta hai kahin jism bhatakti hai kahin ruh

ghar mein hun magar aj main be ghar ki tarah hun

aqdar ki uthti hui diwar mein chun lo

raste mein para mein kisi patthar ki tarah hun