ذہن کا کچھ منتشر تو حال کا خستہ رہا

ذہن کا کچھ منتشر تو حال کا خستہ رہا

کتنا میری ذات سے وہ شخص وابستہ رہا

صبح کاذب روشنی کے جال میں آنے لگی

سیم گوں سورج اجالے پر کمر بستہ رہا

دیکھنے میں کچھ ہوں میں محسوس کرنے میں ہوں کچھ

چشم بینا پر مرا یہ راز سربستہ رہا

اپنے زنداں سے نکلنا اپنی طاقت میں نہیں

ہر بشر اپنے لیے زنجیر پابستہ رہا

پرسش غم میں نہ مجھ سے ہی محض عجلت ہوئی

اس کی آنکھوں کا چھلک پڑنا بھی برجستہ رہا

اپنے اندر کی خلش کا کر لیا میں نے علاج

میرے دل میں دوسروں کا درد پیوستہ رہا

یا مسائل سے تقابل زندگی سے یا فرار

بچ نکلنے کا وہاں سے ایک ہی رستہ رہا

zehn ka kuchh muntashir to hal ka khasta raha

kitna meri zat se wo shakhs wabasta raha

subh-e-kazib raushni ke jal mein ane lagi

sim gun suraj ujale par kamar basta raha

dekhne mein kuchh hun main mahsus karne mein hun kuchh

chashm-e-bina par mira ye raz sarbasta raha

apne zindan se nikalna apni taqat mein nahin

har bashar apne liye zanjir pabasta raha

pursish-e-gham mein na mujh se hi mahz ujlat hui

us ki ankhon ka chhalak parna bhi barjasta raha

apne andar ki khalish ka kar liya main ne ilaj

mere dil mein dusron ka dard paiwasta raha

ya masail se taqabul zindagi se ya farar

bach nikalne ka wahan se ek hi rasta raha