جب جب بھی دیکھیے اسے خوں بار سی لگے

جب جب بھی دیکھیے اسے خوں بار سی لگے

دنیا ہمیشہ برسر پیکار سی لگے

ہر ہر نفس پہ رنگ بدلتی ہے زندگی

اک پھول سی لگے ہے کبھی خار سی لگے

چہرہ ہے میرے دوست کا یا کوئی آئنہ

دیکھوں الٹ پلٹ کے تو بھی آرسی لگے

عادت سی پڑ گئی ہے اسے بولنے کی تیز

وہ بات بھی کرے ہے تو تکرار سی لگے

تم ساتھ ہو تو ہم بھی بیاباں کو گھر کریں

یہ سخت دھوپ سایۂ دیوار سی لگے

ہر ہر قدم پہ جیسے کہ بکتا ہو آدمی

بستی تمام مصر کے بازار سی لگے

عابدؔ تمام شہر پہ عالم ہے کون سا

ہر ایک شکل نقش بہ دیوار سی لگے

jab jab bhi dekhiye use khun bar si lage

duniya hamesha barsar-e-paikar si lage

har har nafas pe rang badalti hai zindagi

ik phul si lage hai kabhi khar si lage

chehra hai mere dost ka ya koi aina

dekhun ulat palat ke tu bhi arsi lage

adat si par gai hai use bolne ki tez

wo bat bhi kare hai to takrar si lage

tum sath ho to ham bhi bayaban ko ghar karen

ye sakht dhup saya-e-diwar si lage

har har qadam pe jaise ke bikta ho admi

basti tamam misr ke bazar si lage

abid tamam shahr pe alam hai kaun sa

har ek shakl-e-naqsh ba diwar si lage