حادثوں سے بے خبر تھے لوگ دھرتی پر تمام

حادثوں سے بے خبر تھے لوگ دھرتی پر تمام

آسماں کی نیلگوں آنکھوں میں تھے منظر تمام

رفتہ رفتہ رسم سنگ باری جہاں سے اٹھ گئی

دھیرے دھیرے ہو گئے بستی کے سب پتھر تمام

تشنہ لب دھرتی پہ جب بہتا ہے پیاسوں کا لہو

مدتوں مقتل میں سر خم رہتے ہیں خنجر تمام

زندگی بکھری ہوئی ہے اس طرح فٹ پاتھ پر

بستیاں آباد ہیں اور لوگ ہیں بے گھر تمام

شاہراہیں دفعتاً شعلے اگلنے لگ گئیں

گھر کی جانب چل پڑا ہے شہر گھبرا کر تمام

صبح کے سارے اجالے راستوں میں کھو گئے

شب کے اندھیاروں میں گم ہیں شام کے منظر تمام

اب کہاں وہ لوگ وہ رونق وہ نغمے وہ فضا

شہر کی گلیاں ہیں سونی سونے بام و در تمام

hadson se be khabar the log dharti par tamam

asman ki nilgun ankhon mein the manzar tamam

rafta rafta rasm-e-sang bari jahan se uth gai

dhire dhire ho gae basti ke sab patthar tamam

tishna lab dharti pe jab bahta hai pyason ka lahu

muddaton maqtal mein sar kham rahte hain khanjar tamam

zindagi bikhri hui hai is tarah fit path par

bastiyan abad hain aur log hain be ghar tamam

shahrahen dafatan shole ugalne lag gain

ghar ki janib chal para hai shahr ghabra kar tamam

subh ke sare ujale raston mein kho gae

shab ke andhiyaron mein gum hain sham ke manzar tamam

ab kahan wo log wo raunaq wo naghme wo faza

shahr ki galiyan hain suni sone bam-o-dar tamam