یہ میرے شہر کا اک اور حادثہ ہوگا

یہ میرے شہر کا اک اور حادثہ ہوگا

وہ کل یہاں مرا مہمان بن چکا ہوگا

تلاش میں ہوں کسی کی میں کب سے سرگرداں

اسی طرح کوئی مجھ کو بھی ڈھونڈھتا ہوگا

مری طرح سے کوئی چیختا ہے راہوں میں

مری طرح کوئی دنیا کو دیکھتا ہوگا

لگا کے آئے گا چہرہ کوئی نیا شب میں

وہ جس کو بیٹھ کے دن میں تراشتا ہوگا

شناسا چہرے بھی لگنے لگے ہیں بیگانے

اب اپنا وقت ہی شاید بدل رہا ہوگا

اداس اداس سا کھویا ہوا سا رہتا ہے

کچھ اس سے بھی کوئی کہہ کر بدل گیا ہوگا

تھکا تھکا سا اسی در پہ آ کے بیٹھا تھا

نہ پوچھا ہوگا کسی نے تو چل دیا ہوگا

جہاں پہنچ کے قدم ڈگمگائے ہیں سب کے

اسی مقام سے اب اپنا راستہ ہوگا

ye mere shahr ka ik aur hadisa hoga

wo kal yahan mira mehman ban chuka hoga

talash mein hun kisi ki main kab se sargardan

isi tarah koi mujh ko bhi dhundhta hoga

miri tarah se koi chikhta hai rahon mein

miri tarah koi duniya ko dekhta hoga

laga ke aega chehra koi naya shab mein

wo jis ko baith ke din mein tarashta hoga

shanasa chehre bhi lagne lage hain begane

ab apna waqt hi shayad badal raha hoga

udas udas sa khoya hua sa rahta hai

kuchh us se bhi koi kah kar badal gaya hoga

thaka thaka sa usi dar pe a ke baitha tha

na puchha hoga kisi ne to chal diya hoga

jahan pahunch ke qadam dagmagae hain sab ke

usi maqam se ab apna rasta hoga