نئے شیشے میں اب ڈھل جائے ہر رسم کہن ساقی

نئے شیشے میں اب ڈھل جائے ہر رسم کہن ساقی

تجھے دنیا بدلتی ہے مجھے یہ انجمن ساقی

وہاں کس کام کے یہ ساغر و مینا و پیمانہ

جہاں چلتا ہے تیری مست آنکھوں کا چلن ساقی

نہ آنکھ اٹھی نہ مے چھلکی نہ ساغر دور میں آیا

مجھے دیتا رہا دھوکے یہ تیرا بانکپن ساقی

لکھا ہے نام میرا یوں تو ہر اک شاخ پر لیکن

نہ میرے پھول ہیں ساقی نہ میرا ہے چمن ساقی

ہٹا ساغر نہ میرے سامنے سے اس کو رہنے دے

کہ اس سے جھانکتی ہے میرے خوابوں کی دلہن ساقی

مزا جب ہے مری مستی کو تو دو آتشہ کر دے

نگاہوں سے نگاہوں کا بھی ہونے دے ملن ساقی

ذرا بھیگی ہوئی زلفوں کی دو اک بوند ٹپکا دے

سلگتا ہے نہ جانے کب سے میرا تن بدن ساقی

تری زلفوں کے سائے میں ڈھلی راتوں کا کیا کہنا

مگر کچھ اور کہتا ہے سحرؔ کا بانکپن ساقی

nae shishe mein ab dhal jae har rasm-e-kuhan saqi

tujhe duniya badalti hai mujhe ye anjuman saqi

wahan kis kam ke ye saghar-o-mina-o-paimana

jahan chalta hai teri mast ankhon ka chalan saqi

na ankh uthi na mai chhalki na saghar daur mein aya

mujhe deta raha dhoke ye tera bankpan saqi

likha hai nam mera yun to har ik shakh par lekin

na mere phul hain saqi na mera hai chaman saqi

hata saghar na mere samne se us ko rahne de

ke us se jhankti hai mere khwabon ki dulhan saqi

maza jab hai miri masti ko to do atisha kar de

nigahon se nigahon ka bhi hone de milan saqi

zara bhigi hui zulfon ki do ik bund tapka de

sulagta hai na jane kab se mera tan badan saqi

tiri zulfon ke sae mein dhali raton ka kya kahna

magar kuchh aur kahta hai sahar ka bankpan saqi