شب فراق کو یوں جگمگا رہا ہوں میں

شب فراق کو یوں جگمگا رہا ہوں میں

بجھا کے شمع کو اب دل جلا رہا ہوں

خیال یار کو دل میں بسا رہا ہوں میں

تصورات کی دنیا سجا رہا ہوں میں

غم حیات غم دل کا لطف پانے کو

اجل کے ہاتھ سے دامن چھڑا رہا ہوں میں

عجیب حال ہے شاخوں سے پھول جھڑتے ہیں

بھری بہار میں آنسو بہا رہا ہوں میں

یہ راز فاش نہ ہو جائے آنسوؤں سے کہیں

تمہارے غم کو تمہیں سے چھپا رہا ہوں میں

نہ لب پہ کوئی شکایت نہ دل ہے فریادی

تمہاری بزم سے خاموش جا رہا ہوں میں

اٹھاؤ ساز ملاؤ دلوں کے تاروں کو

نئی حیات کے نغمے سنا رہا ہوں میں

وصال و ہجر کا عالم عجیب عالم ہے

فسانہ شب کا سحرؔ کو سنا ہوں میں

shab-e-firaq ko yun jagmaga raha hun main

bujha ke shama ko ab dil jala raha hun

khayal-e-yar ko dil mein basa raha hun main

tasawwurat ki duniya saja raha hun main

gham-e-hayat-e-gham dil ka lutf pane ko

ajal ke hath se daman chhura raha hun main

ajib hal hai shakhon se phul jharte hain

bhari bahar mein ansu baha raha hun main

ye raz fash na ho jae ansuon se kahin

tumhare gham ko tumhen se chhupa raha hun main

na lab pe koi shikayat na dil hai fariyadi

tumhari bazm se khamosh ja raha hun main

uthao saz milao dilon ke taron ko

nai hayat ke naghme suna raha hun main

wisal-o-hijr ka alam ajib alam hai

fasana shab ka sehr ko suna hun main