لب و نظر کو ترے پیار کی ہنسی نہ ملی

لب و نظر کو ترے پیار کی ہنسی نہ ملی

کرے جو دل میں اجالا وہ روشنی نہ ملی

ہزار بار چمن سے بہار گزری ہے

یہ اور بات ہے پھولوں کو تازگی نہ ملی

یہ کیسی رات ہے کس شہر کے یہ رستے ہیں

جگر کا خون جلا بھی تو روشنی نہ ملی

وہاں تو کٹ گئیں عیش و نشاط میں عمریں

یہاں تو ایک مسرت کی سانس بھی نہ ملی

ہر ایک پھول میں پایا ترا ہی رنگ و جمال

کوئی بھی شکل گلستاں میں اجنبی نہ ملی

تمہارے روپ کی یہ چاندنی بھی کیا کم ہے

نہیں یہ فکر مجھے روشنی ملی نہ ملی

ہر ایک راہ نے دوری بڑھائی منزل کی

دکھائے راہ جو منزل کی وہ کلی نہ ملی

ہمارے پاؤں کی زنجیر تو بنی کڑیاں

دلوں کو جوڑ دے ایسی کوئی کڑی نہ ملی

تمام عمر ترستی رہی نگاہ سحرؔ

اجالے دن کے ملے شب کی چاندنی نہ ملی

lab-o-nazar ko tire pyar ki hansi na mili

kare jo dil mein ujala wo raushni na mili

hazar bar chaman se bahar guzri hai

ye aur bat hai phulon ko tazgi na mili

ye kaisi rat hai kis shahr ke ye raste hain

jigar ka khun jala bhi to raushni na mili

wahan to kat gain aish-o-nishat mein umren

yahan to ek masarrat ki sans bhi na mili

har ek phul mein paya tira hi rang-o-jamal

koi bhi shakl-e-gulistan mein ajnabi na mili

tumhare rup ki ye chandni bhi kya kam hai

nahin ye fikr mujhe raushni mili na mili

har ek rah ne duri barhai manzil ki

dikhae rah jo manzil ki wo kali na mili

hamare paon ki zanjir to bani kariyan

dilon ko jor de aisi koi kari na mili

tamam umr tarasti rahi nigah sahar

ujale din ke mile shab ki chandni na mili