نگاہ و دل کو جلانے کا حوصلہ تو کرو

نگاہ و دل کو جلانے کا حوصلہ تو کرو

اٹھا کے پردے حقیقت کا سامنا تو کرو

بساط رقص پہ نغموں سے کھیلنے والو

کسی غریب کی فریاد بھی سنا تو کرو

کسی کے عیب تمہیں پھر نظر نہ آئیں گے

خود اپنے آپ کو تفصیل سے پڑھا تو کرو

وہ زندگی کے لئے ہو کہ ہو اجل کے لئے

ہمارے حق میں کبھی تم کوئی دعا تو کرو

دکھائی دیں گے ہمیں ہم تمہارے چہرے میں

نظر کے سامنے اک بار آئنہ تو کرو

مجاز خود ہی حقیقت کا روپ ڈھالے گا

یہ شرط ہے کہ حق بندگی ادا تو کرو

ہماری آنکھ میں سورج کو ڈھونڈنے والو

تم اپنے دل کو اجالوں سے آشنا تو کرو

میں کائنات کی ہر شے کو چھوڑ سکتا ہوں

تم اپنے درد محبت سے آشنا تو کرو

بہت طویل سہی شب تمہاری زلفوں کی

سحرؔ کو ان کے اجالوں سے آشنا تو کرو

nigah-o-dil ko jalane ka hausla to karo

utha ke parde haqiqat ka samna to karo

bisat-e-raqs pe naghmon se khelne walo

kisi gharib ki fariyad bhi suna to karo

kisi ke aib tumhen phir nazar na aenge

khud apne ap ko tafsil se parha to karo

wo zindagi ke liye ho ke ho ajal ke liye

hamare haq mein kabhi tum koi dua to karo

dikhai denge hamen ham tumhare chehre mein

nazar ke samne ik bar aina to karo

majaz khud hi haqiqat ka rup dhalega

ye shart hai ke haq-e-bandagi ada to karo

hamari ankh mein suraj ko dhundne walo

tum apne dil ko ujalon se ashna to karo

main kainat ki har shai ko chhor sakta hun

tum apne dard-e-mohabbat se ashna to karo

bahut tawil sahi shab tumhari zulfon ki

sahar ko un ke ujalon se ashna to karo