مرا غم گسار کوئی نہیں کسی لب پہ آئی دعا نہیں

مرے چارہ گر ترے پاس بھی مرے درد دل کی دوا نہیں

کبھی ساتھ ساتھ ہے تو مرے کبھی دور تک بھی پیا نہیں

مرے ہم سفر تری دوستی کا یہ راز کیا ہے کھلا نہیں

تری آرزو مری زندگی تری جستجو مری بندگی

تری یاد میری نماز ہے کوئی کام اس کے سوا نہیں

وہی بے خودی وہی سر خوشی وہی بے ہوشی وہی گمرہی

مجھے آپ اپنی تلاش ہے میں کہاں ہوں مجھ کو پتا نہیں

یہ تو اپنا اپنا خلوص ہے یہ تو اپنا اپنا سلوک ہے

کوئی چاہنے سے گرا نہیں کوئی پوچھنے سے اٹھا نہیں

تجھے مانگنے سے ملے گا کیا ترا سر جھکانے سے ہوگا کیا

یہ تو پتھروں کا جہان ہے یہاں کوئی تیرا خدا نہیں

میں خزاں نصیب سدا رہا میں بھری بہار میں لٹ گیا

مجھے راس آئی نہ زندگی مجھے مل کے کچھ بھی ملا نہیں

نہ تو اب خوشی کی تلاش ہے نہ سکون کی مجھے آرزو

یہی زندگی کا ہے فیصلہ کہ خوشی بھی غم کے سوا نہیں

وہ نفس نفس میں خلش تری وہ ترے خلوص کی بے رخی

تجھے ہر قدم یہی خوف ہے ترا غم تو مجھ سے جدا نہیں

وہی دل میں ہے وہی لب پہ ہے وہی آنسوؤں میں رواں دواں

اسے کیسے بھولوں سحرؔ بتا جو مرے نفس سے جدا نہیں