پری سفر میں رمق تک نہیں گئی ہوگی

پری سفر میں رمق تک نہیں گئی ہوگی

مجھے پتہ ہے دھنک تک نہیں گئی ہوگی

یہ آسمان جو معمول کے مطابق ہے

زمیں کی چیخ فلک تک نہیں گئی ہوگی

نظر میں آتی ہوئی تیرگی خلاؤں بیچ

یہ روشنی بھی چمک تک نہیں گئی ہوگی

اسے خبر ہے طبیعت ہی میری ایسی ہے

مجھے یقیں ہے وہ شک تک نہیں گئی ہوگی

یہ لفظ یوں ہی پگھلتے رہیں گے کاغذ پر

یہ آگ شہر خنک تک نہیں گئی ہوگی

پھر آسمان کا منظر جلا ہوا دیکھا

کسی کی آنکھ پرکھ تک نہیں گئی ہوگی

وہ پھر خموش نگاہیں لیے ہوئے باسطؔ

مری کسی بھی جھلک تک نہیں گئی ہوگی

pari safar mein ramaq tak nahin gai hogi

mujhe pata hai dhanak tak nahin gai hogi

ye asman jo maamul ke mutabiq hai

zamin ki chikh falak tak nahin gai hogi

nazar mein ati hui tirgi khalaon bich

ye raushni bhi chamak tak nahin gai hogi

use khabar hai tabiat hi meri aisi hai

mujhe yaqin hai wo shak tak nahin gai hogi

ye lafz yun hi pighalte rahenge kaghaz par

ye ag shahr khunuk tak nahin gai hogi

phir asman ka manzar jala hua dekha

kisi ki ankh parakh tak nahin gai hogi

wo phir khamosh nigahen liye hue basit

miri kisi bhi jhalak tak nahin gai hogi