رنگ برنگی یادوں کا گلدان بچا ہے لے دے کر

رنگ برنگی یادوں کا گلدان بچا ہے لے دے کر

میرے جینے کا بس اک سامان بچا ہے لے دے کر

کھانے پینے کی سب چیزیں مہنگائی کی نذر ہوئیں

مہمانوں کے آگے دستر خوان بچا ہے لے دے کر

ردی کاغذ کی قیمت میں بچے اس کو بیچ نہ دیں

گھر میں جو غالبؔ کا اک دیوان بچا ہے لے دے کر

باپ کی ساری جاگیریں تو بانٹ لیں مل کر بیٹوں نے

ماں کے حصے میں گھر کا دالان بچا ہے لے دے کر

دولت عورت اور شہرت کی دیوانی اس دنیا میں

مشکل سے کچھ لوگوں کا ایمان بچا ہے لے دے کر

کیا جانے برسات کٹے گی کیسے میرے بچوں کی

گھر کی ڈھیری میں تھوڑا سا دھان بچا ہے لے دے کر

چل کر اب دیدارؔ وہیں پر گھر اپنا آباد کرو

گاؤں میں جو پرکھوں کا اک کھلیان بچا لے دے کر

rang barangi yadon ka guldan bacha hai le de kar

mere jine ka bas ik saman bacha hai le de kar

khane pine ki sab chizen mahngai ki nazr huin

mehmanon ke age dastar khwan bacha hai le de kar

ridi kaghaz ki qimat mein bachche us ko bich na den

ghar mein jo ghalib ka ik diwan bacha hai le de kar

bap ki sari jagiren to bant len mil kar beton ne

man ke hisse mein ghar ka dalan bacha hai le de kar

daulat aurat aur shohrat ki diwani is duniya mein

mushkil se kuchh logon ka iman bacha hai le de kar

kya jane barsat kategi kaise mere bachchon ki

ghar ki dhiri mein thora sa dhan bacha hai le de kar

chal kar ab didar wahin par ghar apna abad karo

gaon mein jo purkhon ka ik khalyan bacha le de kar