تھم ذرا وقت اجل دیدار جاں ہونے لگا

تھم ذرا وقت اجل دیدار جاں ہونے لگا

آخری ہچکی پہ کوئی مہرباں ہونے لگا

کس ستم گر نے اڑا لی یاد ماضی کی بیاض

ہر گلی ہر موڑ پر قصہ بیاں ہونے لگا

جانے کس گل نے چمن کی حرمتیں پامال کیں

موسم فصل بہاراں بھی خزاں ہونے لگا

دفن کر کے قبر میں جب جا چکے احباب دوست

جو کبھی سوچا نہ تھا وہ امتحاں ہونے لگا

دست و پا شل ہو گئے ہیں قوتیں زائل ہوئیں

زندگانی کا سفر آگے رواں ہونے لگا

خواہشوں کی چاہ میں خسران کے سودے کئے

منفعت سمجھا جسے آخر زیاں ہونے لگا

کوئی وعدہ آج تک ایفا نہیں تم نے کیا

بات سچی تھی مگر وہ بد گماں ہونے لگا

پاؤں کی آہٹ نے مجھ کو گور میں چونکا دیا

ہچکیوں کا ساز دل کا ترجماں ہونے لگا

کیسی خوش فہمی تمہیں کس بات کا غرہ امیدؔ

آ گئے ہیں اقربا وقت اذاں ہونے لگا

tham zara waqt-e-ajal didar jan hone laga

akhiri hichki pe koi mehrban hone laga

kis sitam gar ne ura li yad mazi ki bayaz

har gali har mor par qissa bayan hone laga

jane kis gul ne chaman ki hurmaten pamal-e-kin

mausam-e-fasl-e-baharan bhi khizan hone laga

dafn kar ke qabr mein jab ja chuke ahbab dost

jo kabhi socha na tha wo imtihan hone laga

dast-o-pa shil ho gae hain quwwaten zail huin

zindagani ka safar age rawan hone laga

khwahishon ki chah mein khusran ke saude kiye

munfaat samjha jise akhir ziyan hone laga

koi waada aj tak ifa nahin tum ne kiya

bat sachchi thi magar wo bad guman hone laga

paon ki ahat ne mujh ko gor mein chaunka diya

hichkiyon ka saz-e-dil ka tarjuman hone laga

kaisi khush fahmi tumhen kis bat ka ghurra umid

a gae hain aqriba waqt-e-azan hone laga