کہا ہے میں نے یہ کب ماہتاب مل جائے

کہا ہے میں نے یہ کب ماہتاب مل جائے

مجھے تو بس مری آنکھوں کا خواب مل جائے

میں اس گلی سے یہی سوچ کر گزرتا ہوں

کتاب زیست کا گم گشتہ باب مل جائے

سبھی گناہ میں ہنس کر قبول کر لوں گا

فقیہ شہر کا تجھ کو خطاب مل جائے

ملے فقط مرے حصے کی روشنی مجھ کو

طلب کہاں ہے کوئی آفتاب مل جائے

بقدر ظرف ہی گرچہ سوال ہے میرا

عجب نہیں کہ مجھے بے حساب مل جائے

میں بحر فکر میں ہوں غرق اس لیے نایابؔ

گہر مجھے بھی کوئی زیر آب مل جائے

kaha hai main ne ye kab mahtab mil jae

mujhe to bas miri ankhon ka khwab mil jae

main us gali se yahi soch kar guzarta hun

kitab-e-zist ka gum gashta bab mil jae

sabhi gunah mein hans kar qubul kar lunga

faqih-e-shahr ka tujh ko khitab mil jae

mile faqat mire hisse ki raushni mujh ko

talab kahan hai koi aftab mil jae

baqadr-e-zarf hi garche sawal hai mera

ajab nahin ke mujhe be hisab mil jae

main bahr fikr mein hun gharq is liye nayab

guhar mujhe bhi koi zer-e-ab mil jae