اس طرح کھو گیا ہوں میں اپنے وجود میں

اس طرح کھو گیا ہوں میں اپنے وجود میں

اب خود کو ڈھونڈتا ہوں میں اپنے وجود میں

عادت سی پڑ گئی ہے جو تنقیص کی مجھے

کیڑے نکالتا ہوں میں اپنے وجود میں

کچھ اس طرح سے ڈھائے ہیں حالات نے ستم

گم ہو کے رہ گیا ہوں میں اپنے وجود میں

تم تو مرے وجود کا حصہ نہ تھے کبھی

کیوں تم کو ڈھونڈھتا ہوں میں اپنے وجود میں

قائم ہے مجھ میں میرے تخیل کی سلطنت

بے تاج بادشا ہوں میں اپنے وجود میں

مجھ پر مرے وجود کا ہر نقص ہے عیاں

خود ایک آئنہ ہوں میں اپنے وجود میں

نایابؔ انقلاب زمانہ کی ہے دلیل

بدلاؤ دیکھتا ہوں میں اپنے وجود میں

is tarah kho gaya hun main apne wajud mein

ab khud ko dhundta hun main apne wajud mein

adat si par gai hai jo tanqes ki mujhe

kire nikalta hun main apne wajud mein

kuchh is tarah se dhae hain halat ne sitam

gum ho ke rah gaya hun main apne wajud mein

tum to mire wajud ka hissa na the kabhi

kyun tum ko dhundhta hun main apne wajud mein

qaim hai mujh mein mere takhayyul ki saltanat

be taj badsha hun main apne wajud mein

mujh par mire wajud ka har naqs hai ayan

khud ek aina hun main apne wajud mein

nayab inqilab zamana ki hai dalil

badlao dekhta hun main apne wajud mein