مشکل میں ڈالتا ہوں میں اپنے وجود کو

مشکل میں ڈالتا ہوں میں اپنے وجود کو

آساں بنا رہا ہوں میں اپنے وجود کو

تکمیل چاہتا ہوں میں اپنے وجود کی

ہر رخ سے دیکھتا ہوں میں اپنے وجود کو

دونوں کے درمیان کہیں کچھ ہے مشترک

سو تجھ میں ڈھونڈھتا ہوں میں اپنے وجود کو

کر دے نہ وار مجھ پہ مرا میں یہ سوچ کر

خود سے بچا رہا ہوں میں اپنے وجود کو

اپنے وجود سے نہیں میں مطمئن ابھی

ہر لمحہ مانجھتا ہوں میں اپنے وجود کو

رنج و الم کی بھٹی میں نایابؔ ڈال کر

کندن بنا رہا ہوں میں اپنے وجود کو

mushkil mein dalta hun main apne wajud ko

asan bana raha hun main apne wajud ko

takmil chahta hun main apne wajud ki

har rukh se dekhta hun main apne wajud ko

donon ke darmiyan kahin kuchh hai mushtarak

so tujh mein dhundhta hun main apne wajud ko

kar de na war mujh pe mira mein ye soch kar

khud se bacha raha hun main apne wajud ko

apne wajud se nahin main mutmain abhi

har lamha manjhta hun main apne wajud ko

ranj-o-alam ki bhatti mein nayab dal kar

kundan bana raha hun main apne wajud ko