بیان حال مفصل نہیں ہوا اب تک

بیان حال مفصل نہیں ہوا اب تک

جو مسئلہ تھا وہی حل نہیں ہوا اب تک

نہیں رہا کبھی میں اس کی دسترس سے دور

مری نظر سے وہ اوجھل نہیں ہوا اب تک

بچھڑ کے تجھ سے یہ لگتا تھا ٹوٹ جاؤں گا

خدا کا شکر ہے پاگل نہیں ہوا اب تک

جلائے رکھا ہے میں نے بھی اک چراغ امید

تمہارا در بھی مقفل نہیں ہوا اب تک

مجھے تراش رہا ہے یہ کون برسوں سے

مرا وجود مکمل نہیں ہوا اب تک

دراز دست تمنا نہیں کیا میں نے

کرم تمہارا مسلسل نہیں ہوا اب تک

برس کچھ اور مری جان ٹوٹ کے مجھ پر

یہ خطہ جسم کا جل تھل نہیں ہوا اب تک

نہ آیا باز وہ نایابؔ اپنی فطرت سے

وفا کا شہر بھی جنگل نہیں ہوا اب تک

bayan hal mufassal nahin hua ab tak

jo masala tha wahi hal nahin hua ab tak

nahin raha kabhi main us ki dastaras se dur

miri nazar se wo ojhal nahin hua ab tak

bichhar ke tujh se ye lagta tha tut jaunga

khuda ka shukr hai pagal nahin hua ab tak

jalae rakha hai main ne bhi ik charagh-e-ummid

tumhara dar bhi muqaffal nahin hua ab tak

mujhe tarash raha hai ye kaun barson se

mira wajud mukammal nahin hua ab tak

daraz dast-e-tamanna nahin kiya main ne

karam tumhara musalsal nahin hua ab tak

baras kuchh aur miri jan tut ke mujh par

ye khitta jism ka jal thal nahin hua ab tak

na aya baz wo nayab apni fitrat se

wafa ka shahr bhi jangal nahin hua ab tak