خود اپنے آپ سے روٹھا ہوا ہوں

خود اپنے آپ سے روٹھا ہوا ہوں

سمجھتے ہیں وہ میں ان سے خفا ہوں

حقائق سے چرا کر آنکھ اپنی

میں کن سایوں کے پیچھے بھاگتا ہوں

کوئی تو راستہ ہوگا بتانا

ترے دل تک پہنچنا چاہتا ہوں

بظاہر ہے ہنسی ہونٹوں پہ میرے

مگر اندر سے میں ٹوٹا ہوا ہوں

جہاں خود کو مقفل کر رکھا تھا

میں اس کمرے کی چابی کھو چکا ہوں

یہ کس نے مجھ کو بس میں کر لیا ہے

اشاروں پر میں کس کے چل رہا ہوں

اگرچہ حال ہے تاریک میرا

ستارہ آنے والے وقت کا ہوں

تپا ہوں آتش دوراں میں نایابؔ

تو اب جا کر کہیں کندن بنا ہوں

khud apne ap se rutha hua hun

samajhte hain wo main un se khafa hun

haqaiq se chura kar ankh apni

main kin sayon ke pichhe bhagta hun

koi to rasta hoga batana

tire dil tak pahunchna chahta hun

bazahir hai hansi honton pe mere

magar andar se main tuta hua hun

jahan khud ko muqaffal kar rakha tha

main is kamre ki chabi kho chuka hun

ye kis ne mujh ko bas mein kar liya hai

isharon par main kis ke chal raha hun

agarche hal hai tarik mera

sitara ane wale waqt ka hun

tapa hun atish-e-dauran mein nayab

to ab ja kar kahin kundan bana hun