میں نے کوشش کی بہت لیکن کہاں یکجا ہوا

میں نے کوشش کی بہت لیکن کہاں یکجا ہوا

صفحۂ ہستی کا شیرازہ رہا بکھرا ہوا

ذہن کی کھڑکی کھلی دل کا دریچہ وا ہوا

تب جہاں کے درد سے رشتہ مرا گہرا ہوا

کیا پتہ کب کون اس کی زد پہ آ جائے کہاں

وقت کی رفتار سے ہر شخص ہے سہما ہوا

کس کی یاد آئی معطر ہو رہے ہیں ذہن و دل

کس کی خوشبو سے ہے سارا پیرہن مہکا ہوا

پیڑ کے نیچے شکاری جال پھیلائے ہوئے

اور پرندہ شاخ پر بیٹھا ڈرا سہما ہوا

دو قدم بھی اب تمہارے ساتھ چلنا تھا محال

راہ تم نے خود الگ کر لی چلو اچھا ہوا

زندگی ہر زاویے سے دیکھتا ہوں میں تجھے

ہے مری فکر و نظر کا دائرہ پھیلا ہوا

چھپ گئی پانی میں اپنی چھب دکھا کر جل پری

آج پھر نایابؔ میرے ساتھ اک دھوکہ ہوا

main ne koshish ki bahut lekin kahan yakja hua

safha-e-hasti ka shiraza raha bikhra hua

zehn ki khirki khuli dil ka daricha wa hua

tab jahan ke dard se rishta mira gahra hua

kya pata kab kaun us ki zad pe a jae kahan

waqt ki raftar se har shakhs hai sahma hua

kis ki yad ai muattar ho rahe hain zehn-o-dil

kis ki khushbu se hai sara pairahan mahka hua

per ke niche shikari jal phailae hue

aur parinda shakh par baitha dara sahma hua

do qadam bhi ab tumhare sath chalna tha muhal

rah tum ne khud alag kar li chalo achchha hua

zindagi har zawiye se dekhta hun main tujhe

hai miri fikr-o-nazar ka daira phaila hua

chhup gai pani main apni chhab dikha kar jal pari

aj phir nayab mere sath ik dhoka hua