باعث آسودگی ہے حشر سامانی مجھے

باعث آسودگی ہے حشر سامانی مجھے

راس آتی ہے بڑی مشکل سے آسانی مجھے

دیکھ کر تیری عنایت اور ترا لطف و کرم

کھل رہی ہے یار اپنی تنگ دامانی مجھے

کر رہا ہے ذہن میں گردش کوئی دھندلا سا عکس

لگ رہی ہے اس کی صورت جانی پہچانی مجھے

سوچنے کا زاویہ میں نے بدل ڈالا ہے دوست

اب پریشانی نہیں لگتی پریشانی مجھے

سونپ دی اس نے مجھے اپنے بدن کی سلطنت

مل گئی ہو مفلسی میں جیسے سلطانی مجھے

لقمۂ گرداب ہونے ہی کو تھا میں اور پھر

دفعتاً آئی نظر اک موج امکانی مجھے

آج پھر کھلنے لگی ہے مجھ پہ رمز کائنات

آج پھر ہونے لگی ہے خود پہ حیرانی مجھے

سوچتا ہوں اولی مصرع جب کبھی نایابؔ میں

خود کو لکھواتا ہے بڑھ کر مصرع ثانی مجھے

bais-e-asudgi hai hashr samani mujhe

ras ati hai bari mushkil se asani mujhe

dekh kar teri inayat aur tira lutf-o-karam

khul rahi hai yar apni tang damani mujhe

kar raha hai zehn mein gardish koi dhundla sa aks

lag rahi hai us ki surat jani pahchani mujhe

sochne ka zawiya main ne badal dala hai dost

ab pareshani nahin lagti pareshani mujhe

saunp di us ne mujhe apne badan ki saltanat

mil gai ho muflisi mein jaise sultani mujhe

luqma-e-girdab hone hi ko tha main aur phir

dafatan ai nazar ik mauj imkani mujhe

aj phir khulne lagi hai mujh pe ramz-e-kainat

aj phir hone lagi hai khud pe hairani mujhe

sochta hun aula misra jab kabhi nayab mein

khud ko likhwata hai barh kar misra-e-sani mujhe