اس شوخ نے نگاہ نہ کی ہم بھی چپ رہے

اس شوخ نے نگاہ نہ کی ہم بھی چپ رہے

ہم نے بھی آہ آہ نہ کی ہم بھی چپ رہے

آیا نہ ان کو عہد ملاقات کا لحاظ

ہم نے بھی کوئی چاہ نہ کی ہم بھی چپ رہے

دیکھا کئے ہماری طرف بزم غیر میں

تجدید رسم و راہ نہ کی ہم بھی چپ رہے

تھا زندگی سے بڑھ کے ہمیں وضع کا خیال

جب عمر نے نباہ نہ کی ہم بھی چپ رہے

خاموش ہو گئیں جو امنگیں شباب کی

پھر جرأت گناہ نہ کی ہم بھی چپ رہے

مغرور تھا کمال سخن پر بہت حفیظؔ

ہم نے بھی واہ واہ نہ کی ہم بھی چپ رہے

us shokh ne nigah na ki ham bhi chup rahe

ham ne bhi ah ah na ki ham bhi chup rahe

aya na un ko ahd-e-mulaqat ka lihaz

ham ne bhi koi chah na ki ham bhi chup rahe

dekha kiye hamari taraf bazm-e-ghair mein

tajdid-e-rasm-o-rah na ki ham bhi chup rahe

tha zindagi se barh ke hamen waza ka khayal

jab umr ne nibah na ki ham bhi chup rahe

khamosh ho gain jo umangen shabab ki

phir jurat-e-gunah na ki ham bhi chup rahe

maghrur tha kamal-e-sukhan par bahut hafiz

ham ne bhi wah wah na ki ham bhi chup rahe