جوانی کے ترانے گا رہا ہوں

جوانی کے ترانے گا رہا ہوں

دبی چنگاریاں سلگا رہا ہوں

مری بزم وفا سے جانے والو

ٹھہر جاؤ کہ میں بھی آ رہا ہوں

بتوں کو قول دیتا ہوں وفا کا

قسم اپنے خدا کی کھا رہا ہوں

وفا کا لازمی تھا یہ نتیجہ

سزا اپنے کیے کی پا رہا ہوں

خدا لگتی کہو بت خانے والو

تمہارے ساتھ میں کیسا رہا ہوں

زہے وہ گوشۂ راحت کہ جس میں

ہجوم رنج لے کر جا رہا ہوں

چراغ خانۂ درویش ہوں میں

ادھر جلتا ادھر بجھتا رہا ہوں

نئے کعبے کی بنیادوں سے پوچھو

پرانے بت کدے کیوں ڈھا رہا ہوں

نہیں کانٹے بھی کیا اجڑے چمن میں

کوئی روکے مجھے میں جا رہا ہوں

ہوئی جاتی ہے کیوں بیتاب منزل

مسلسل چل رہا ہوں آ رہا ہوں

حفیظؔ اپنے پرائے بن رہے ہیں

کہ میں دل کو زباں پہ لا رہا ہوں

jawani ke tarane ga raha hun

dabi chingariyan sulga raha hun

miri bazm-e-wafa se jane walo

thahar jao ke main bhi a raha hun

buton ko qaul deta hun wafa ka

qasam apne khuda ki kha raha hun

wafa ka lazmi tha ye natija

saza apne kiye ki pa raha hun

khuda lagti kaho but khane walo

tumhare sath mein kaisa raha hun

zahe wo gosha-e-rahat ke jis mein

hujum-e-ranj le kar ja raha hun

charagh-e-khana-e-darwesh hun main

idhar jalta idhar bujhta raha hun

nae kaabe ki buniyadon se puchho

purane but kade kyun dha raha hun

nahin kante bhi kya ujre chaman mein

koi roke mujhe main ja raha hun

hui jati hai kyun betab manzil

musalsal chal raha hun a raha hun

hafiz apne parae ban rahe hain

ke main dil ko zaban pe la raha hun