کمبخت دل برا ہو تری آہ آہ کا

کمبخت دل برا ہو تری آہ آہ کا

حسن نگاہ بھی نہ رہا گاہ گاہ کا

چھیڑو نہ میٹھی نیند میں اے منکر و نکیر

سونے دو بھائی میں تھکا ماندہ ہوں راہ کا

میرے مقلدوں کو مری راہ شوق میں

ہر گام پر نشان ملا سجدہ گاہ کا

دل سا گواہ حشر میں آ کر پھسل گیا

اب رحم پر معاملہ ہے داد خواہ کا

کس منہ سے کہہ رہے ہو ہمیں کچھ غرض نہیں

کس منہ سے تم نے وعدہ کیا تھا نباہ کا

دل لینے والی بات اسی دل سے پوچھیے

مالک یہی ہے میرے سفید و سیاہ کا

پیش خدا چلو تو مزہ جب ہے اے حفیظؔ

نعرہ ہو لب پہ اشہد ان لا الہ کا

kambakht dil bura ho tiri ah ah ka

husn-e-nigah bhi na raha gah gah ka

chhero na mithi nind mein ai munkir-o-nakir

sone do bhai mein thaka manda hun rah ka

mere muqallidon ko miri rah-e-shauq mein

har gam par nishan mila sajda gah ka

dil sa gawah hashr mein a kar phisal gaya

ab rahm par muamla hai dad khwah ka

kis munh se kah rahe ho hamen kuchh gharaz nahin

kis munh se tum ne waada kiya tha nibah ka

dil lene wali bat isi dil se puchhiye

malik yahi hai mere safed-o-siyah ka

pesh-e-khuda chalo to maza jab hai ai hafiz

naara ho lab pe ashhad un la ala ka