اک بار پھر وطن میں گیا جا کے آ گیا

اک بار پھر وطن میں گیا جا کے آ گیا

لخت جگر کو خاک میں دفنا کے آ گیا

ہر ہم سفر پہ خضر کا دھوکا ہوا مجھے

آب بقا کی راہ سے کترا کے آ گیا

حور لحد نے چھین لیا تجھ کو اور میں

اپنا سا منہ لیے ہوئے شرما کے آ گیا

دل لے گیا مجھے تری تربت پہ بار بار

آواز دے کے بیٹھ کے اکتا کے آ گیا

رویا کہ تھا جہیز ترا واجب الادا

مینہ موتیوں کا قبر پہ برسا کے آ گیا

میری بساط کیا تھی حضور رضائے دوست

تنکا سا ایک سامنے دریا کے آ گیا

اب کے بھی راس آئی نہ حب وطن حفیظؔ

اب کے بھی ایک تیر قضا کھا کے آ گیا

ik bar phir watan mein gaya ja ke a gaya

lakht-e-jigar ko khak mein dafna ke a gaya

har ham safar pe khizr ka dhoka hua mujhe

ab-e-baqa ki rah se katra ke a gaya

hur-e-lahad ne chhin liya tujh ko aur main

apna sa munh liye hue sharma ke a gaya

dil le gaya mujhe tiri turbat pe bar bar

awaz de ke baith ke ukta ke a gaya

roya ke tha jahez tira wajib-e-alada

menh motiyon ka qabr pe barsa ke a gaya

meri bisat kya thi huzur-e-raza-e-dost

tinka sa ek samne dariya ke a gaya

ab ke bhi ras ai na hub-e-watan hafiz

ab ke bhi ek tir-e-qaza kha ke a gaya