او دل توڑ کے جانے والے دل کی بات بتاتا جا

او دل توڑ کے جانے والے دل کی بات بتاتا جا

اب میں دل کو کیا سمجھاؤں مجھ کو بھی سمجھاتا جا

ہاں میرے مجروح تبسم خشک لبوں تک آتا جا

پھول کی ہست و بود یہی ہے کھلتا جا مرجھاتا جا

میری چپ رہنے کی عادت جس کارن بد نام ہوئی

اب وہ حکایت عام ہوئی ہے سنتا جا شرماتا جا

یہ دکھ درد کی برکھا بندے دین ہے تیرے داتا کی

شکر نعمت بھی کرتا جا دامن بھی پھیلاتا جا

جینے کا ارمان کروں یا مرنے کا سامان کروں

عشق میں کیا ہوتا ہے ناصح عقل کی بات سجھاتا جا

تجھ کو ابرآلود دنوں سے کام نہ چاندنی راتوں سے

بہلاتا ہے باتوں سے بہلاتا جا بہلاتا جا

دونوں سنگ راہ طلب ہیں راہنما بھی منزل بھی

ذوق طلب ہر ایک قدم پر دونوں کو ٹھکراتا جا

نغمے سے جب پھول کھلیں گے چننے والے چن لیں گے

سننے والے سن لیں گے تو اپنی دھن میں گاتا جا

آخر تجھ کو بھی موت آئی خیر حفیظؔ خدا حافظ

لیکن مرتے مرتے پیارے وجہ مرگ بتاتا جا

o dil tor ke jane wale dil ki bat batata ja

ab main dil ko kya samjhaun mujh ko bhi samjhata ja

han mere majruh tabassum khushk labon tak ata ja

phul ki hast-o-bud yahi hai khulta ja murjhata ja

meri chup rahne ki adat jis karan bad nam hui

ab wo hikayat am hui hai sunta ja sharmata ja

ye dukh dard ki barkha bande din hai tere data ki

shukr-e-nemat bhi karta ja daman bhi phailata ja

jine ka arman karun ya marne ka saman karun

ishq mein kya hota hai naseh aql ki bat sujhata ja

tujh ko abralud dinon se kam na chandni raton se

bahlata hai baton se bahlata ja bahlata ja

donon sang-e-rah-e-talab hain rahnuma bhi manzil bhi

zauq-e-talab har ek qadam par donon ko thukrata ja

naghme se jab phul khulenge chunne wale chun lenge

sunne wale sun lenge to apni dhun mein gata ja

akhir tujh ko bhi maut ai khair hafiz khuda hafiz

lekin marte marte pyare wajh-e-marg batata ja