ہم ہی میں تھی نہ کوئی بات یاد نہ تم کو آ سکے

ہم ہی میں تھی نہ کوئی بات یاد نہ تم کو آ سکے

تم نے ہمیں بھلا دیا ہم نہ تمہیں بھلا سکے

تم ہی نہ سن سکے اگر قصۂ غم سنے گا کون

کس کی زباں کھلے گی پھر ہم نہ اگر سنا سکے

ہوش میں آ چکے تھے ہم جوش میں آ چکے تھے ہم

بزم کا رنگ دیکھ کر سر نہ مگر اٹھا سکے

رونق بزم بن گئے لب پہ حکایتیں رہیں

دل میں شکایتیں رہیں لب نہ مگر ہلا سکے

شوق وصال ہے یہاں لب پہ سوال ہے یہاں

کس کی مجال ہے یہاں ہم سے نظر ملا سکے

ایسا ہو کوئی نامہ بر بات پہ کان دھر سکے

سن کے یقین کر سکے جا کے انہیں سنا سکے

عجز سے اور بڑھ گئی برہمی مزاج دوست

اب وہ کرے علاج دوست جس کی سمجھ میں آ سکے

اہل زباں تو ہیں بہت کوئی نہیں ہے اہل دل

کون تری طرح حفیظؔ درد کے گیت گا سکے

ham hi mein thi na koi bat yad na tum ko a sake

tum ne hamen bhula diya ham na tumhen bhula sake

tum hi na sun sake agar qissa-e-gham sunega kaun

kis ki zaban khulegi phir ham na agar suna sake

hosh mein a chuke the ham josh mein a chuke the ham

bazm ka rang dekh kar sar na magar utha sake

raunaq-e-bazm ban gae lab pe hikayaten rahen

dil mein shikayaten rahen lab na magar hila sake

shauq-e-wisal hai yahan lab pe sawal hai yahan

kis ki majal hai yahan ham se nazar mila sake

aisa ho koi nama bar bat pe kan dhar sake

sun ke yaqin kar sake ja ke unhen suna sake

ijz se aur barh gai barhami mizaj-e-dost

ab wo kare ilaj-e-dost jis ki samajh mein a sake

ahl-e-zaban to hain bahut koi nahin hai ahl-e-dil

kaun tiri tarah hafiz dard ke git ga sake